Sapah pyasan mu dwiyaq

Pnyahan Wikipidiya
跳至導覽 跳至搜尋

Sapah pyasan mu dwiyaq(我山上的小學)[smmalu patas | ida npatas sspgan ka smmalu patas]

Sapah pyasan mu dwiyaq, malu balay qtaan ,malu bay san muyas uri, niqan emptsa niqan laqi muyas uri msupu muyas mi ppulah sapah pyasan kddiyax, kiya mi sapah pyasan kuxul nami bay sahan kddiyax. Sapah pyasan mu dwiyaq way alang tnpusu sediq, yami llaqi muyas u kndadah nami alang mi ssiyaw qnpahan. kiya kda hay duma nami mksa nanaq musa sapah pyasan , duma nami kda hay papa nami rulu musa sapah pyasan, uxay kiya kda hay hadun nami na tama,bubu musa sapah pyasan. dhuq nami sapah pyasan dow tna niqan emptsa way mhiyu rhngung sapah pyasan tmawa yami miyah meuyas.kiyai mqaras ku bay musa sapah pyasan kddiyax.


Sapah pyasan mu niqan ou kluwan qhuni way mtqri sapas pyasan mu hiya, saw ka qhuni dara nasi dhuq krpuhan dow priyuh qtaan ka wasaw na da, duma wasaw u wada asi knpriyux krhibung qtaan. kiya ka qhuni cnuing nasi dhuq tnwasaw dow tmhpah kana dmi , saw bay embhway ucilung qtaan.Kiya mi hbaraw bay sediq miyah mrmux sapah pyasan mu mangan sasing mi mksa.yabay wada malu bay qtaan malu bay sknhan uri ka bwihur na; ssiyaw pyasan u ou bay klwan phpah uri tuhuy mnan smluhay. Dungan niqan kingal llabang bay spriq saan nami ppulah mi tumal kddiyax . kndadah icil alang sediq miyah qmita sapah pyasan mu u rmngaw bay kana “tagay bay knmalu qtaan ka sapah pyasan namu nii! tndahu misu balay!” emca tmdahu bay.


Sayang makulux mqaras balay muyas sapah pyasan hini . Tmtsa mnan laqi muyas ruman sapah pyasan u hbaraw bay ka tlmukan, niqan kingal ka Sejiq mi kingal ka Paywan uri, dhiya way mdrumuc bay tmsa mnan, sbliqun nami dha bay uri. Sngayan iyax diyax spac u Niqan kingal ka emptsa miyah tmsa mnan kari Sediq , kingal ka emptsa kari tayal kingal ka emptsa kari bunun uri.diyax nii emprngaw nami kari nami nanaq. Pusu mdudul sapah pyasan mu u embiyax bay dmudug mnan laqi muyas quri kari Sediq, kari Bunu, kari tayal ni kari klmukan uri, kiya hiya u Sejdiq balay uri, tdhuun na bay ka endaan rudan cbiyaw. Mnrngaw “iya bay chngii ka endaan drudan ta cbiyaw, niqan malu bay waya ta ka it sediq, ini tduwa knhmuc, kmbiyax muyas mi qbhangi bay ka kari tama namu mi bubu namu”emca. Laqi muyas sapah pyasan mu,niqan nami mspac kmxalan rima hiyi,emppwalu nami kana,mddayaw nami kddiyax uri, saw nami kingal tnsapah, saw nami mswayi.


Muyas nami sapah pyasan ou bay klwan ka slhayun nami, saw ka kari ta Sediq mi emdaan rudan ta cbiyaw, saw ka kari Amirika, muyas uyas mi rmri uri, matas patas ni tduwa ptasun ka lnglungan ta nanaq uri. Yaku emduwa ku muyas saw nii sapah pyasan, qrasun mu bay, swalu mu bay ka way mu thiqan muyas sapah pyasan mu.sprun mu bay ka emptsa sapah pyasan mu uri.kiya mi yaku u, sprun mu mi qrasun mu baytdhuun mu bay ka sapah pyasan mu.