Rqda(爐灶)

Rrqda o qyqaya shapuy uqun hpuyan, spowda dha tahuc puniq dmdang, saw ka supih, kama dnii, kiya ka mhada ka uqun.

Rqda niqan tru mkray ni shjing na btnux, ida kingal nanaq ka btunux nii, uxay leexan qtaan ka saw nii btunux. Rmngaw ka sjiqan mkla mgaaw btunux seejiq alang o “asi ka musa miyin keeayug, kika slayun su hiya ka btunux" msa.

Sapah Seejiq sbiyaw uxay uri o bigi qnpahan ga, qulung niqan rqda. Yasa pusu bi ka rqda, kiya ni pniqun dha ruwan sapah ka rqda. Mnrngaw ka drudan alang “Tru rqda nii ga niqan bi dungus niya, kingal btunux o nirih tama, kingal btunux o nirih bubu, kingal btunux o nirih laqi ga seupu mniq kingal ruwan sapah kana. Tru btunux nii ga saw bi kingal tnsapah, ska dha o thuun puniq, pkmuhul lnglungan ni qbubur kingal tnsapah nii. Tru rqda btunux nii ga tduwa asi bsai babaw dxgal, tduwa rmuxux cikuh ruwan dxgal, pusu na o sdhgan hiya.

Taywan ga niqan kingal ka bowqax bi dgiyaq, yaasa kndadax baraw ni dhiyaq qmita o saw bi rqda qtaan kiya ka “Dgiyaq Rqda” ksun dha tmhangan ka dgiyaq nii da. Manu ka ga nklaan hidaw Hwa-reyn na Truku o “Dgiyaq Silung” ksun dha kiya.

“Dgiyaq Rqda” nii ga, ga msayus pusu qsiya Mu-kwa na Nan-tow-seyn Jen-ay-syang ni Hwa-reyn-seyn syow-rin-syang, ga kska na pusu Dgiyaq Tudu, “Dgiyaq Rqda” nii ga, niqan 3261 m ka qnbqaxan na, “Dgiyaq Rqda” nii ga msdalih dha Elug Seng-kaw yuey-ring, pusu tutu na o mquri gqian hidaw mrijing maa bhniq qtaan, ququy na o bbaraw qtaan, ga gmimax mhru hiya ka qqhuni ciway uri, maa bbuyu qtaan.

Kiya ni “rqda” kari nii ga, mniq kari Seejiq o ida niqan dha dungus na, kingal o qyqay hpuyan ruwan sapah, mlutuc kneudus sjiqan, mririh mgay gnealu kingal tnsapah; Kingal o hangal bowqax dgiyaq Taywan sayang, dupan Seejiq uri ka hiya. Yasa saan bi mkksa sjiqan, kika niqan bi hangan na, klaun bi seejiq ana kneinu.

Qtaan patas bnatas (參考資料)

Embnatas patas : Lituk Peymu (詹素娥)

Embatas : Kumu Basaw (谷慕‧巴紹)