Quri gaya musa qmita wauwa

Quri gaya musa qmita wauwa 提親的規則

Nasi qmita naqih spi ka brah mmowsa qmita wauwa o asi ka psaun bukuy hari jiyax ka musa qmita wauwa, madas kingal mkla bi rmngaw radan alang. Dhuq sapah wauwa ka dhiya do rudan alang ga asi psleexan bi rmngaw quri rudan wauwa ka pusu na seiyah nami sayang, saw nii rmbaqan kari na rmngaw,“bhangaw kari o niqan suyang bi ghak krig ka sapah namu, bqani nami haya ghak nii saun name prana, huya msa ka lnglung su hug?”(nii o rmibaq kari ngalaw mu ka wauwa su empaaina mu) Nasi ungat kari n aka rudan wauwa ga smruwa ka lnglungan na empbkal, kiya ka kiya ni nasi niqan kari na,asi bruinah miyah sapah ka rudan risaw. Ini qbsiyaq musa qmita duri tama risaw, saw nii mtbbrih musa qmita wauwa o bitaq mn12, nasi ida ini sruwa do kika hana malax ka dhiya ni musa miying kingal wauwa duri. Manu saw kiya do asi ka tqlahang balay gmaaw ka emptqnay musa qmita wauwa,

(1) musa emptqnay o gmaaw mkla bi rmngaw rudan 選會說話的耆老陪同去

(2) asi ka qmita spi aji uri o psisil mn 3 必須要夢卜或靈鳥卜三次

(3) kika muda pnsrhuqan kari da 才有女方同意的結果

Malu ka pnrngagan dha do muda psrahuq kari ni muda empprngaw quri msdangi, gnqbubur, mgay jiyax quri sapah wauwa, babaw na muda msdangi o bitaq bi 3 hngkawas do muda mstrung, kiya ka kiya ni bsiyaq balay o 5 hngkawas. Jiyax psdngian o muda psdhug rmbug qsiya baga ka risaw ni wauwa, duri ni mgay kingal mneudus babuy prngat peekan na rudan wauwa muda mqaras pnsrahuq kari ni msdangi ka risaw.

Pnsrahuq kari do miyah smjiyax sapah wauwa 30 jiyax aji uri o 50 jiyax dmayaw sapah wauwa ka risaw. Embbgay qngqaya ni prajin g embbkal Spdakar bi rudan ka mgkala kari ka risaw ni wauwa brah ini pstrung na, psramal qngqaya mstrung siida, nasi ini kla mseusa tminun ka wauwa o asi na ka qhduun bi smluhay mkla  tminun  qabang ni lukus ka 5 hngkawas nii. Jiyax pstrngan siida musa pgkla dlutut na ka risaw, ssramal dha hlama, duri ni miyah mdayaw gmdara babuy uqun pntrian.

Miyah sapah risaw kana ka dlutut wauwa ni risaw, mtqiri tluung ka dlutut wauwa psramal masug siyang pntrian, sapah wauwa o playun dha pgkla ka eiyah ka dlutut dha, kika klaun risaw mha piya ka psrmalun nasug, muda masug siida ini bi tduwa srhuqan ana kingal ka nasug, mdka bi knlala ka siyang kingal ensugan,nasi niqan ka srhuqan dga, paru bi psrbangun mkeekan bitaq bi ini pggaluk ka pngluban dha.

Duri o masug siyang siida asi ka sngkkingal qmada quri kingal ensgan,. psiyuk kingal mneudus babuy ka wauwa giqan na risaw, tai saw mha niqan nasug dha musa sapah ka dhiya uri.

pnyahan kari

資料來源: 口述者 Yudaw Pisaw 2005