Pusu Seediq

Pusu seediq(賽德克族人起源）

Mprengo ku kingal so pnyahan rudan cbeyo sa, qnbhangan mu so kari rudan daha, tama su ma, pnyahan ta so plaale ta so menaq bobo dheran hini, rseno sa, ddaha si. Lmngelung ka ddaha rseno si ma, ita naq daha rseno mesa sa, ma uka dungus ka ita naq rseno mesa si, ma ye pneeyah naq inu ka ki, anu ka seediq dungal so bbaro snuunux si, ma wada remux pusu beling, pusu qhuni hi si, saan daha so mqiri si ma, mqedil menaq hi si, uka lukus cbeyo han, mbberas kana, desun daha si ma, musa smalu kingal sun sapah niqal si ma, ma lmngelung ka seediq si ma, mqedil ki si, sdngedan daha hi ka sun qyqeya na kiya, kesun kiya si we luqah kesun daha sa, ini daha kulay so sun mqedil si peni, sdngedan daha si ma, ini pttuku diida ka luqah na si, ma, usa, wada skgulun musa bubul qsiya ka kiyan rseno si ma, wada bubul qsiya si ma, wada dmidil kiyan qriyan si.

Ma, tlame ta mita ka so luqah nii mesa sa, skdiun daha so henu sa, ye so daha thiiqan, hnuwan daha so beling birac ma, beling muhing ma so toma qduwan si, ka henu si ma, tlame ta ka sun luqah ki mesa si ma, wada hiya di si we, ye niqal dungus na, mlawa ka seediq si, mlpuudus ta di mesa si. Nii so slayun so oda ta muudus di mesa si.

Ma gisu ka kiyal rseno si we, wada muda pehing ptebuk tnlaman muda ptebuk sdheriq qriyan na di si, uka qsiya di si. Mpkuudus ta di mesa si ma, ye bsiyaq hari di si we, skpahung ka mqedil ki di si, ma peeyah ciida di si ge, tuting laqi mqedil si. Kika ye slmeyan so oda mprana bobo dheran di peni, wada mrana ka seediq di si ma, mrana hbaro ka seediq di si ma, kika laqi pstrengun daha dungal si ma, kika msterung ka laqi ma, hbaro ka seediq di si.

Pusu Seediq (賽德克族-人的起源說)

Qbhangan mu rdrudan wada mgedun ka pnyahan ta cbeyo.

Daha ka rseno ka slale tkriyak.

Ini klai kndalax inu ka seediq bbaro snunux, mbberas kana seediq cbeyo, wada remux lhengo pusu qhuni ka heya, mosa muuruy ka rseno, kela naq mqedil ka heya.

Wada suupu remux sapah truma ka dheya, smkagun ka kingal rseno:” usa bubun qsiya.”

Kiya ka, wada mangan qriyan desun na bubun qsiya.

Cwaqun daha qsiya ka sneku mqedil “luqah” mesa ka rseno.

Mrengo ka heya:” Tlame ta luqah na!”

Wada daha tlamun ka berin birac, muhing ma toma qduwan, tlame ta luqah ma, wada remux du niqan ba dungus.

Mlawa ku:”Wada miyan sdlayan ka kkuudus di!”

Tmalang ka rseno, sdheri mu takun, wad ana prequn ka qriyan uka ka qsiya di.

Rnengo tgbukuy na mesa:”Pkuudus ta di!”

Ini qbsiyaq skpahung ka mqedil bobo mntuting laqi, pstrengun daha laqi, mrana ka sseediq di.