Lubuy tqian laqi rabu (嬰孩的吊床)

Paah slaqi mdakil alang dgiyaq daya ga, ida wada egu bi qntaan dha ni endaan dha mniq alang dgiyaq daya sbiyaw, ida dsaw nii kana ka laqi dgiyaq.

Pxal slaqi ku siida, niqan ku kingal swayi snaw, bubu mu o panu na ka swayi mu snaw, djiyun ku na baga ka yaku musa qpahan hnmaan rsrisah. Dhuq nami qpahan do miying niqan sasaw qhuni rsrisah ka bubu mu. Kiya ni ngalan na brah ka swayi mu snaw ni pkmxun na knan. Siisa kmxun mu brah ka swayi mu snaw ni smkaway ku qmita bubu mu, wada madas kruc ni mquri bbuyu djima, saw bi gaga miying manu qtaan.

Ini qbsiyaq do nii mhaal kingal saw bi kulaw baga qnthran na djima ka bubu mu, duri ni wada mquri ssiyaw kndrxan btunux hiya. Gqian na iyax kndrxan btunux ka kingal ddux djima, isil djima o bkiyan na sida pusu qhuni risa kiya. Spagun na babaw dxgal ka pala sbal, mangal muhing sbal ni bkiyun na babaw djima swilwil qtaan, saw hari spac qaqay babuy gisu swilan baraw djima, saw bi smhulis qtaan, ida “ lubuy tqian rubu laqi ” ksun dha ka nii.

Mnhdu pqaya lubuy tqian swayi mu snaw ka bubu do, paah brah mu mangal swayi mu snaw. Psaan na ruwan lubuy tqian ka swayi mu snaw, shaluy na pala pungun duri ka rabu laqi, ksugun na ptucing ruwan hiya ka sida qhuni rsrisah ni wasaw sudu. Mmowsa qmpah ka bubu mu siida, hmici rmngaw knan ka bubu mu, “ Ptaqi da ka swayi su snaw nii, thwayi lmglug ka lubuy tqian swayi su snaw nii ha, ptaqi nanaq kiya hari da, asi su ka emsuwil yahan qmiri wah! ”

Bubu mu ga, wada qmeepah hunac hari qpahan. Qtaun mu ka hiya ga gisu mangal parih qmulah spriq, emsuwil mu qbhangan gaga mpttuk ka parih ni bbtunux, maku “ kiyang ” “ kiyang ” msa ka hmnang na, ririh saw gaga pgkla knan, gisu ku qmeepah hini ha.

Ana nanaq bitaq sayang ga, ini mu balay shngii ka endaan mu slaqi ku siida, ini mu bi shngii ka qntaan mu bnsaan lubuy tqian rabu sbiyaw ka swayi mu snaw.

Mtaqi ruwan lubuy tqian ka swayi mu snaw, saw bi gaga kmxun brah bubu msblaiq balay qtaan, lnglungun mu balay ka knkla na bubu mu ana bitaq sayang.

Sayang do ida ungac qtaan ka saw nii da, pusu bi o ungac qtaan ka sbal pala uri da. Ida tmninun nanaq rdrudan ka sbal nii, kiya ni lnglungum bi bubu rudan ni tama rudan ka lubuy tqian laqi sibyaw.