Kuxul mu meuda euda(我喜歡做的事)

Mnsa ka bubu mu“ini bi gdma kdjiyax ka yabung mu nii, egu bi ka kuxul na meuda, Saw ka qmita nanaq patas ni dreybi, smbu teynnaw, saw ka rmgrig ni tminun pala,saw ka smgealu swayi na qrijil ni swayi na snaw, smsik dxgal ni sminaw uqan tnsapah uri, musa nanaq miing dangi thiyan na hmrapas”, yasa kuxul mu bi meuda ka euda nii. Kiya ni prngaw ku kuxul mu meuda euda hini ha.

(一)

Tgkingal kuxul mu meuda o kiya ka“qmita patas”, yasa pkla seejiq ana manu ka pnatas ruwan patas hiya, tduwa ku sluhay egu pnatas, klaun mu ka endaan dseejiq uri, qnita mu o patas tmgsa knan “shuya muda qmpah ? ”, kiya ka musa niqan bi ririh na ka qnpah. “Shuya mudus babaw dxgal ni shuya gmealu quri qrinuc seejiq ? ”, kiya ka musa malu bi ka kndsan ta babaw dxgal . Wada egu bi ka qntaan mu patas da, kiya ni egu nanaq ka wada mu klaun ddaun uri da . Kiya ni musa ku kmbarux egu hari patas qtaaun mu kdjiyax, ana saw knuwan nasi niqan jiyax mu o smkuxul ku mangal patas ni qtaun mu.

(二)

Tgdha kuxul mu meuda o kiya ka“rmgrig ni tminun pala”, sapah pyasan mu niqan emptgsa tmgsa mnan laqi meuyas “mgrig ni tminun pala”, mgrig nami grig rudan sbiyaw, saw ka siyo siyo si…ni ohnay ohnay yaku o Yabung Miquy…Duri tminun nami egu pala sluun nami lubuy pila, lubuy patas, bunuh tunux ni lukus uri…, endaan rudan sbiyaw ka euda nii, niqan bi ririh na.Tdhuun bi seejiq isil alang ka tninun ta pala. Kndadax hini mkla ku egu endaan rudan sbiyaw, mkla ku mgrig ni tminun pala uri, kiya ni dhuq sayang smkuxul ku bi mgrig ni tminung pala .

(三)

Tgtru kuxul mu meuda euda o kiya ka“smsik dxgal ni sminaw uqan tnsapah”, ruwan sapah mu yasa yaku ka pusu bi qbsuran laqi qrijil, bubu mu paah ku laqi ciway siida, tgsaan ku na“shuya kmaraw sapah ni shuya sminaw qngqaya ?”, kiya ni musa malu bi nniqan ka sapah sun. Asi ku ka dmayaw kmaraw sapah kdjiyax, ssikun mu ni iyux mu pkmalu kana ka dxgal, kragun mu ka tqiyan ni hpuyan ni stmayan lupung ni dangi miyah tuhuy sapah, dxgal nganguc ni uyung o ssikun mu kdjiyax uri.

Kmalu mu sminaw kana ka uqan pratu ni hpuyan uqan, kiya ka mdudug ni tmdahu bi knan ka tama mu, kiya ni smkuxul ku meuda “smsik dxgal ni sminaw uqan tnsapah mu”. Ruwan sapah mu sbliqun mu bi kdjiyax, ini mu bi ksrudu. Sayang gaga ku meuyas sapah pyasan kska, ana egu ka pyasun mu patas, mtna na hiya ini ku ksuraw,smkuxul ku bi qmita patas ni seupu ku mgrig thiyan mu meuyas sapah pyasan mu hiya ni tminun nami uri. Duri smsik ni kmaraw nniqan o asi ka qulung ddaun uri. Kiya ka ana ima,qmita knan sgealu ku dha balay , yaku o sun dha “kiya ka laqi meuyas balay”ana knuwan uxay mu bi kpriyux ka euda mu saw nii.