Endaan mu nniqan mdakil paru(我的成長經歷)

Pnaah ku dgiyaq alang pulan, Seejiq balay ku yaku. Paah ku laqi sii da, mqrinuc ka sapah mu, ana nanaq ku mqrinuc, ida ku mtrumuc bi qmeepah ni tkriwaq knmalu ka kndusan mu.

Kndadax ku laqi siida, naqih bika hiyi mu, kmtutu mnarux ni mtalux ka tunux mu, siida ungac ka ppanun rulu basu ni ungac ka sapah spuhan, mnarux ku kjiyax do, pana ku na bukuy ka tama ni bubu mu, dsun ku na pqita empsapuh, muda nami naquh na elu, tqiri nami bowkax dgiyaq ni bubuyu dgiyaq, mkla ku, mnarux ku laqi sii da, panan ku na bukuy ka tama, knkingal muda mksa naqih na elug, ana bowqax ni Bbaraw ka elug, qtaan mu mliwang bika hngiyan bukuy tama, ida kiya ka stmaan mu ni knmuxul qsahur mu pkbiyax lnglungan mu.

Mkla ku, iyux skeudus knna ka tama, meuwc bi miing elug, mnsuwil ungac ka hbangan marig iyu uqun, kika tama mu ka tbeydaq sulay mu da, maku mkkrang ka baga na, ana saw kiya, mkray bi ka lnglungan tama, yasa mggealu ku na, ana bi ta knuwan ini mu bi shngii.

Ananaq mqrinuc bi ka sapah mu, pyasan tgska ungac ku bi brahan musa smluxay madas, yasa krusi ka kndusan nami, asi ka musa ku qmeepah nganguc, sntuku hbangan, dmayaw mdanga swayi snaw ni swayi grijil, naqih kuxul na rmngaw knnan ka tama bubu mu, "ungac nami brahan pusa meuya patas isu", maku mnihur ka lnglungan mu, ana saw kiya mkla ku qulung ku bi embiyax ka lnglungan mu, yasa mkla ku ini pstuq elug ka mqrinuc, krinah ka tama ni bubu, kiya ni niqan kingal jiyax kulung ku bi niqan biyax da, tduwa ku qmlahang tama bubu mu do, ungac ka tama bubu mu da, wada meydan da.

Qtaan patas bnatas (參考資料)

Embnatas patas: Lawa Piyuc (黃美麗)

Embatas: Kumu Basaw (谷慕‧巴紹)