Sangi(葫蘆瓜)[smmalu patas | ida npatas sspgan ka smmalu patas]

Qriyan nii ge mntena cangi puqul, hnyegan daha ini pntena. Msderux ma, uxe duri we msbheniq hari qtaun ka hei cangi ma, mtumun ka hei qriyan ma bale niqan nduyung so qqriyan. Ani si qriyan nii ka ngalan daha bbulan qsiya ka rudan ta cbeyo, ani dehuk hndure hari dungal we ga ta dooyun nana.

　　Uka bakic ka cbeyo, qriyan nii nirih daha bakic ka rudan ta cbeyo. Qriyan sslmeun bbulan nii we asi ka gmao paru na, kika mphepah ka bubu qriyan nii de, pskryaanun daha　rima hari ka hei na pnlaale smpuga, tapun daha kana ka mnthiti mphepah. Mdudul paru ka hei na de, krngiyun trteru ba ka kingal pusu qriyan nii ma, bale paru ba ka hei na denu.

　　Mhada ka qriyan nii dige, sqitun daha ka nduyung na ma, dungeun daha. Mdengun de ngalun daha ka buuc na skuun daha, qriyan mrengah kii ka bbulan daha qsiya, meniq ka rehak snkuwan di we kii ka pprana daha bobo. Skruwa daha so nii kana pnhgalan ka rudan ta cbeyo, rmangi rehak na. 　　